daghon se dil-o-sina ke afrokhta-jaan hun
go main chaman-e-taza hun par waqf-e-khizan hun

pahlu mein agar dil hai to tu dil mein hai mere
go nang-e-khalaeq hun magar jaan-e-jahan hun

jis khak pe main baith gaya fitna uthaya
kis sarw-e-khiraman ki kaf-e-pa ka nishan hun

hamrah tumhaare hun kisi ja hun kahin hun
saya ki tarah tum ho jahan main bhi wahan hun

yarab ho bura wahshat dil ka ki nahin chain
jab khak hua mar ke to ab reg-e-rawan hun

kya zist hai ye khak meri aashiq-e-nashad
gah masraf-e-fariyaad hun gah waqf-e-fughan hun