dil phadak jaega wo shokh jo khandan hoga
apne khirman ko na is barq se nuqsan hoga

subh-e-mahshar ka agar chaak gareban hoga
mere matam mein sar-e-hur bhi uryan hoga

munkir-e-sajda-e-adam ko pashemani hai
wo na samjha tha ki ye rutba-e-insan hoga

khak suljhegi teri zulf meri jaanib se
kaun juz baad-e-saba silsila-e-jumban hoga

husn ke rashk se ho jaenge gul zard o safed
aur hi aalam-e-gul-ha-e-gulistan hoga

chashm-e-kafir se tere honge musalman kafir
kham-e-abru se sanam gabr musalman hoga

jab 'shuur' us se kaha zakhm-e-jigar kari hai
kaj-adai se wo yun kahne laga han hoga