dil tak laraz utha hai tere iltifat par
ab iltifat hai bhi to tohmat hayat par

likhiye to likhte rahiye kitaben tamam umr
wo tabsire hue hain meri baat baat par

tarik ho na jae kahin mahfil-e-hayat
ab aandhiyon ka zor hai sham-e-hayat par

dekhe hue se khwab hain chaunken bhi kis liye
kuchh muskura to lete hain hum hadsat par

har har qadam charagh kahan tak jalaoge
tarikiyan to din ki bhi warid hain raat par

dhaara to waqiat ka 'mahshar' mudega kya
behtar ye hai ki naqd karo waqiat par