dohraun kya fasana-e-khwab-o-khayal ko
guzre kai firaq kisi ke visal ko

rishta ba-juz-guman na tha zindagi se kuchh
main ne faqat qayas kiya mah o sal ko

shayad wo sang-dil ho kabhi mail-e-karam
surat na de yaqin ki is ehtimal ko

targhib ka hai wusat-e-imkan pe inhisar
ram-khurdagi sikhata hai sahra ghazal ko

'sahba' sada bahaar hai ye gulsitan-e-fan
mumkin nahin zawal sukhan ke kamal ko