donon ka la-shuur hai itna mila hua
us ne jo pi sharab to mujh ko nasha hua

kis ki hai dhul mere tasawwuf ke panw mein
kya hai ye khanqah ke dar par pada hua

paida kiya dobara mujhe us ke jism ne
main jo bara-e-wasl gaya tha mara hua

duniya ki har namaz ka mujh ko mila sawab
masjid ka andarun hai mujh par khula hua

ye bhi mere charagh-e-khamoshi ka faiz hai
chaaron taraf hai shor hawa ka macha hua

us ne padhi namaz to main ne sharab pi
donon ko lutf ye hai barabar nasha hua

dekha nahin kabhi na mulaqat hi hui
'ehsas'-ji ka nam hai lekin suna hua