ek husn-e-be-misal ke jo ru-ba-ru hun main
mahsus ho raha hai khud apna adu hun main

apni giraft-e-shauq se niklun to kis tarah
phaila hua jahan mein har ek su hun main

mujh pe teri hayat ka dar-o-madar hai
jazbon se jhankta hua zinda lahu hun main

gunjunga tere zehn ke gumbad mein raat-din
jis ko na to bhula sake wo guftugu hun main

har subh ek marka-e-karbala sahi
har sham apne doston mein surkh-ru hun main

puchhun main kis se aalam-e-imkan mein kis liye
apne hi naqsh-e-pa ki tarah ku-ba-ku hun main

'saifi' mein apne aap mein nilam ho gaya
kis ko khabar thi shahr mein ek khub-ru hun main