fikr-e-anjam na aaghaz ka kuchh hosh raha chaar din tak to jawani ka ajab josh raha main qafas mein bhi kisi roz na khamosh raha kashmakash mein bhi tabiat ka wahi josh raha nashsha-e-ulfat-e-saqi ka ajab josh raha haul-e-sahra-e-qayamat bhi faramosh raha ghair hon jura-e-kash-e-bazm-e-tamanna afsos khun ke ghunt main pita raha khamosh raha hech aafat na-rasad gosha-e-tanhai ra dasht-e-ghurbat mein main ye sonch ke ru-posh raha mausam-e-gul ki hawa daru-e-be-hoshi thi sar uthane ka bhi sabze ko na kuchh hosh raha nikhat-e-gul ki tarah jame se bahar hunga fasl-e-gul ka jo gulistan mein yahi josh raha bahr-e-rahmat mein bahut hoga talatum barpa tujh ko ai ashk-e-nadamat jo yahi josh raha apne sar se bhi kisi roz guzar jaega aab-e-shamshir ko qatil jo yahi josh raha saya-e-daman-e-qatil mein jo nind aai mujhe phir to karwat bhi badalne ka na kuchh hosh raha dhum sunta raha ab aate hain ab aate hain hashr tak main yunhi khole hue aaghosh raha dur khinchti hi gai manzil-e-maqsud magar rah-raw-e-ishq ki himmat ka wahi josh raha rahmat-e-haq rahi hum aasiyon par saya-fagan sar pe chhaya hua ek abr-e-khata-posh raha uthte uthte thi wahi bazm ki mastana rawish chalte chalte bhi khum-e-mai ko wahi josh raha phir gain aankhen meri kucha-e-jaanan ki taraf shukr hai marte dam itna to mujhe hosh raha