har ek bandish-e-khud-sakhta bayan se utha
takallufat ka parda bhi darmiyan se utha

faqat khala hi nahin hai sada lagate chalo
ki abr-e-barish-e-naisan bhi aasman se utha

shajar ke sae mein baitha hun main tujhe kya hai
jo ho sake to mujhe apne aastan se utha

fusun-taraaz thi kab chashm-e-nim-wa itni
lahu ka fitna magar zeb-e-dastan se utha

nazar na aai jo rah-e-mafar to phir main bhi
dhuan dhuan sa sar-e-bazm-e-dostan se utha

yahan ki rasm hai 'sahba' kasad-bazari
ye jins-e-dil hai badi be-baha dukan se utha