hum had-e-indimal se bhi gae ab fareb-e-khayal se bhi gae dil pe tala zaban par pahra yani ab arz-e-haal se bhi gae jam-e-jam ki talash le dubi apne jam-e-sifal se bhi gae khauf-e-kam-maegi bura ho tera aarzu-e-visal se bhi gae shorish-e-zindagi tamam hui gardish-e-mah-o-sal se bhi gae yun mite hum ki ab zawal nahin shauq-e-auj-e-kamal se bhi gae hum ne chaha tha teri chaal chalen hae hum apni chaal se bhi gae husn-e-farda khayal-o-khwab raha aur mazi o haal se bhi gae hum tahi-dast waqf-e-gham hain wahi tang-na-e-sawal se bhi gae sajda bhi 'arsh' un ko kar dekha is rah-e-paemal se bhi gae