ishq ke gham-gusar hain hum log
husn ke raazdar hain hum log

dast-e-qudrat ko naz hai hum par
waqt ke shahkar hain hum log

hum se qaem hai gulistan ka bharam
aabru-e-bahaar hain hum log

manzilen hain hamare qadmon mein
hasil-e-rah-guzar hain hum log

hum se tanzim hai zamane ki
mehwar-e-rozgar hain hum log

hum jo chahenge ab wahi hoga
sahab-e-ikhtiyar hain hum log

hum se raushan hai kaenat 'shakeb'
asl-e-lail-o-nahaar hain hum log