jis tarah ki hain ye diwaren ye dar jaisa bhi hai
sar chhupane ko mayassar to hai ghar jaisa bhi hai

us ko mujh se mujh ko us se nisbaten hain be-shumar
meri chahat ka hai mehwar ye nagar jaisa bhi hai

chal pada hun shauq-e-be-parwa ko murshid man kar
rasta pur-pech hai ya pur-khatar jaisa bhi hai

sab gawara hai thakan sari dukhan sari chubhan
ek khushbu ke liye hai ye safar jaisa bhi hai

wo to hai makhsus ek teri mohabbat ke liye
tera 'anwar' ba-hunar ya be-hunar jaisa bhi hai