kab tak dimagh-e-husn ki nakhwat na jaegi
aise to raegan ye aqidat na jaegi

kikar ki shakh ne ye likha farq-e-qais par
barti tere junun se riayat na jaegi

mahjub sa khada hun hatheli pe dil liye
is rah se ab kabhi ye ziyarat na jaegi

dafnaen hum ko dost kitab-o-qalam samet
zer-e-lahad bhi zist ki aadat na jaegi

maskan kiye hue hai kisi ki dua yahan
aankhon se jite ji to ye hairat na jaegi

'jauhar' gale lago ki milao hazar hath
likh lo dil-e-shaqi se kudurat na jaegi