kash tufan mein safine ko utara hota
dub jata bhi to maujon ne ubhaara hota

hum to sahil ka tasawwur bhi mita sakte the
lab-e-sahil se jo halka sa ishaara hota

tum hi waqif na the aadab-e-jafa se warna
hum ne har zulm ko hans hans ke sahaara hota

gham to khair apna muqaddar hai so is ka kya zikr
zahr bhi hum ko ba-sad-shauq gawara hota

baghban teri inayat ka bharam kyun khulta
ek bhi phul jo gulshan mein hamara hota

tum par asrar-e-fana raaz-e-baqa khul jate
tum ne ek bar to yazdan ko pukara hota