lab-e-shirin hai misri yusuf-e-sani hai ye ladka
na chhodega mera dil chah-e-kanani hai ye ladka

liya bosa kisi ne aur gareban-gir hai mera
dubaya chahta hai sab ko tufani hai ye ladka

sar upar lal chira aur dahan jun ghuncha-e-rangin
bahaar-e-muddaa lal-e-badkhshani hai ye ladka

qayamat hai jhamak bazu ke tawiz-e-talai ki
hisar-e-husn kun qaim kiya bani hai ye ladka

hue ru-posh us ka husn dekh anjum ke jun khuban
chamakta hai ba-rang-mehr nurani hai ye ladka

qayamat qamat us ka jin ne dekha so hua bismil
magar sar ta qadam tegh-e-sulemani hai ye ladka

main apna jaan o dil qurban karun us par seti 'naji'
jise dekhen sin hue id ramzani hai ye ladka