milne wale kahan kahan se mile
maut ko zindagi jahan se mile

aisa khush-rang phul hai ek tu
tera sani na gulistan se mile

dub ja ishq ke samundar mein
raste dil ke to wahan se mile

tu khulus-o-adab ka paikar hai
ab dua tujh ko har zaban se mile

bab sat-rangi tujh ko de aai
rang jab tera aasman se mile

bhul baitha hai wo hamein lekin
yaad us ki to har fughan se mile

kal use shak tha 'renu' manzil ka
aaj har shakhs karwan se mile