nigahon par nigahbani bahut hai
nawazish zill-e-subhani bahut hai

yahan aise hi hum kab baith jate
tere kuche mein virani bahut hai

abhi qasd-e-safar ka qissa kaisa
abhi rahon mein aasani bahut hai

teri aankhen khuda mahfuz rakkhe
teri aankhon mein hairani bahut hai

lab-e-dariya zaban se tar karenge
abhi talwar mein pani bahut hai

mubarak un ko sultani adab ki
mujhe to us ki darbani bahut hai