phir chhalakta hai jam wahshat ka
shah-e-khuban salam wahshat ka

ek chashm-e-ghazal karti hai
chaar-su ehtimam wahshat ka

wo giran-gosh ho hama-tan-gosh
to sunaun kalam wahshat ka

chaak hai ab tera gareban bhi
dekh le intiqam wahshat ka

mauj-e-hairat safar mein rakhti hai
dhundhta hun qayam wahshat ka

aaj to baghban ne gulshan mein
ek bichhaya hai dam wahshat ka

ek taraf mauja-e-sukun hai 'nadim'
ek jaanib khiram wahshat ka