saton falak kiye tah-o-baala nikal gaya
aakhir shab-e-firaq mein nala nikal gaya

wahshat ne mujh pe arsa-e-hasti kiya jo tang
ghabra ke su-e-alam-e-baala nikal gaya

sar de de yaad-e-gesu-e-jaanan ki chah mein
pita karo lakir ko kala nikal gaya

yaqub-war rota main us but ke hijr mein
yusuf mera khuda-e-taala nikal gaya

furqat mein us ki shiddat-e-girya kahan talak
barsa baras ke abr ka jhaala nikal gaya

roka kiye malaeka haft aasman ke
saton falak ko tod ke nala nikal gaya

soe na sakinan-e-mohalla sahar talak
be-sakhta jo raat ko nala nikal gaya

kyun-kar na roiye dil-e-gum-gashta ke liye
naz-o-niam se tha jise pala nikal gaya

pir-e-mughan faqir ko samjhe sharab-khor
jis mai-kade mein le ke piyala nikal gaya

jata na ghar se aap ke zid se raqib ki
lekin ba-pas-e-khatir-e-wala nikal gaya

jhatka jo uljhi zulf ko jhunjhla ke yar ne
haale se machhli kan se baala nikal gaya

kis rashk-e-gul ki dekhi qaba us ne tang chust
bahar jo apne jame se lala nikal gaya

dana tha kya haram ka rizq-e-halal mein
munh se jo ai karim niwala nikal gaya

buta kaho na qamat-e-dilbar ko shaero
ab sarw se bhi wo qad-e-baala nikal gaya

raunda kiya main khar-e-bayaban ko ai junun
har ek bacha ke panw ka chhaala nikal gaya

kambal mein apne garm raha main faqir-e-mast
kiya gaya na dur-dar duna nikal gaya

phir chal dila na kucha-e-gesu ka qasd kar
hai aaj rah kat ke kala nikal gaya

ukta gaya ba-tang hua kya kare gharib
aakhir tumhaara chahne wala nikal gaya

mehman hai faqir hai sun lenge aap 'rind'
murshid ka apne kar ke pyala nikal gaya