ya mulaqat ke imkan se bahar ho ja ya kisi din meri fursat ko mayassar ho ja tujh ko malum nahin hai meri khwahish kya hai mujh pe ehsan na kar aur subuk-sar ho ja irtiqa kya teri qismat mein nahin likkha hai ab tamanna se guzar mera muqaddar ho ja main jahan panw rakhun wan se bagula utthe reg-e-sahra meri wahshat ke barabar ho ja ai mere harf-e-sukhan tu mujhe hairan kar de to kisi din meri ummid se badh kar ho ja