zikr jis ka sahar-o-sham se wabasta hai
raushni zehn ki us nam se wabasta hai

jaise zarra kabhi suraj ke muqabil aa jae
yun mera nam tere nam se wabasta hai

din ke sahra mein bahut der se sham aati hai
us se milne ki dua sham se wabasta hai

dard-mandi bhi mohabbat bhi rawadari bhi
kaam kitna dil-e-nakaam se wabasta hai

zindagi zad pe rahi shauq-e-ziya-pashi mein
ye riwayat bhi mere nam se wabasta hai