maika

By

main ne chaha tha koi ujale sa hath
meri ungli pakad kar mujhe aage badhna sikhae
madrason daftaron shah-rahon makanon dukanon
talak le chale
lekin aisa hua
jis jagah aankhen kholi thi main ne
wahan hath sare roti banane pe mamur the
khauf aata tha ghar se nikalte hue
dagmagate qadam
gung alfaz
bebas nigahen liye
aage badhti thi main
chunki rukna koi hal nahin tha
so main apni gali se nikal kar jahan bhi gai
ajnabi meri sahmi hui zat pe
darte darte ada hoti har baat pe
fiqre kaste rahe
aur hanste rahe
tab se ab tak nahin yaad
kitne hi dariya bahe
kab gulabi badan sanwla ho gaya
ujli be-dagh aankhon mein
kab dard ke zard mausam utar aae
kab aaina dhul se bhar gaya
lekin ab daftaron shah-rahon makanon dukanon mein
jate hue khauf aata nahin
aasmanon ko chhuti imaraat se
ajnabi sar-zaminon se
unche qadon
tez-raftar dariyaon se khauf aata nahin
ab main chalti hun to mere hamrah chalti hain nazmen meri
man se nazmen
bhai se nazmen
waqt
tu ne jo mera gulabi badan sanwla kar
ujalon si nazmen mujhe di hain
tera bahut shukriya

iltija

By

hum wo nahin jo tum samajhte ho
hum wo hain jo tum nahin samajhte
hum lash ke munh pe apni nazm ki mitti dalte hain
aur chain se so jate hain
subh uth kar kaam ki talash mein nikalte hain
hamein aise mat dekho
jaise sukhi ghas baadal ko dekhti hai
hamein aise dekho
jaise marne wala gor-kan ko dekhta hai

hadsa

By

nazm mar gai us din
jab main ne bis rupe bachane ke liye
motor gadi ko rikshe pe fauqiyat di
ab main likhne baithti hun
to kambakht rikshe wale ki
bebas aankhen
kaghaz mein se jhankti hain
main diary phenk deti hun