ye soch kar main ruka tha ki tu pukarega
kise khabar thi khandar chaar-su pukarega

kabhi to shakh-e-talluq mein phul aaenge
kabhi to sard badan ko lahu pukarega

main ek pal ke liye bhi agar hua ojhal
mera junun mujhe ku-ba-ku pukarega

zamin us ke liye tang hoti jaegi
khuda-e-ishq ko jo be-wuzu pukarega

kisi tarah bhi ishaaron se mutmain na hua
shuur-e-zat tujhe ru-ba-ru pukarega