aadhon ki taraf se kabhi paunon ki taraf se

By

aadhon ki taraf se kabhi paunon ki taraf se
aawaze kase jate hain baunon ki taraf se
hairat se sabhi khak-zada dekh rahe hain
har roz zamin ghatti hai konon ki taraf se
aankhon mein liye phirte hain is dar-badari mein
kuchh tute hue khwab khilaunon ki taraf se
phir koi asa de ki wo phunkarte nikle
phir azhdahe firaun ke tonon ki taraf se
tu wahm-o-guman se bhi pare deta hai sab ko
ho jata hai pal bhar mein na honon ki taraf se
baaton ka koi silsila jari ho kisi taur
khamoshi hi khamoshi hai donon ki taraf se
phir baad mein darwaza dikha dete hain 'adil'
pahle wo uthate hain bichhaunon ki taraf se

lekin

By

kali ainak lagae ghumte rahna suraj mein sadkon par hotalon mein
theateron mein masjidon mein dukanon mein railway platform par
bhatiyar galiyon mein shamil hona bujhe bujhe chehron wali bhid mein takte rahna
safed diwaron ko akele layani hai sab kuchh aur jo dikhai deta hai
wo nahin hai phir bhi dikhai deta hai koi farq nahin padta panw hain juraben
na hone se life aur time na padhne se yahi kya kam hai ki subh se
sham tak jama karte hain lafzon ko radio sunte hain aur dekhte hain mere
hue kabutar ki aankh school se lautte hue bachche sharab ki jhil mein tairte
shikare pachas se kam sher ki ghazal nahin likhte firaq aaj bhi qabaili
kamar se bandhe phirte hain chaalen gaz ki shalwar kya hota hai nam se
ya sher kahne se ya din-bhar unghte rahne se ya kitaben sunghne se
tash khelne ka maza hi aur hai ahamadabaad ho ya lahore har jagah hota hai
suraj ghar baithe ganga hai bhai congress mein phut pade ya sat
hazar insan mar diye jaen bhuke uthte hain har subh bistar se kisi ne
dekhe hain baiket aur picasso kabaddi ke maidan mein ya gambarsong ko
istiri karte hue nickson se le kar murar-ji tak koi bhi rok na saka
chhink aur khansi ab aankhen khol dijiye hazrat dekhiye pura
america chhink raha hai khans raha hai idhar dekhiye ye hindostan
bhi chhik raha hai khans raha hai khans raha hai chhik raha hai
kahan se shurua hui hai tarikh aur kahan ja kar rukna hai logon ko
udas rahti hain hamila aurten bas aur cinema ki qatar mein gher rakkhi hai
zamin bhikariyon ne aur mangao charas aur ganja phir bhi alag karna mushkil
hai purani ko new-delhi se lashon ko dekh kar mahfuz nahin hote tum kaise
aadmi ho kahan gain wo tawaifen kahan gae wo qawwal mani to har lafz
mein maujud hai lekin

wo mar gai thi

By

us ke zahri hont kale pad gae the
us ki aaankhon mein
adhuri khwahishon ke dewtaon ke
janaze gad gae the
us ke chehre ki shafaq ka rang
ghael ho chuka tha
us ke jalte jism ki khushbu ka suraj
parbaton ki chotiyon se niche gir kar
tukde tukde ho chuka tha
us ki chhati par
sulagte chand ke sayon ke patthar
rasta roke khade the
us ke jalte jism ke jhulse hue sahra mein
pili hasraton ke aasman
pyase pade the
band kamre mein
meri maujudgi se dar gai thi
wo mar gai thi

waqt ki ret pe

By

waqt ki ret pe suraj ne lahu thuka phir
saaten koda ke daghon mein naha kar niklin
machhliyan lams ke hathon mein ghadi bhar na rukin
haddiyan khwab ke kutton ne chabain shab bhar
hijraten apne muqaddar mein lahu-chehra hain
kaun khamyaza bhugatne ki salakhen chate
kaun zanjir ke halqon mein samundar bandhe
kaun lafzon ke mazaron pe nae phul rakhe
kaun sayon ko talashe yahan qindil liye
abrha kaba ki diwar ke sae mein jale
kanch ki chudiyan bajti hain lahu ki tah mein

waqt ki piTh par

By

waqt ki pith par
kachche lamhon ke dhagon mein lipta hua
shahr ki sidhiyon par sarakta hua
nit nae
khud-kushi ke tariqon ka mujid bana
habshi raaton ke jangal mein bikhri hui
lams ki haddiyan
chun raha hun na jaane main kis ke liye
jab mere nam ke lafz tanha the logo
tumhein surkh honton ki khairaat
kaise mili ye batao
refrigerator mein rakkhi hui tashtari mein
meri donon aankhen barahna padi thin
wahan tak kisi khwab ke hath pahunche nahin
kabutar ki aankhon mein
tute hue aasmanon ka tanazzul na dekho
badan ke shikasta khandar se nikal bhagne ke liye phir
tumhaari madad ki zarurat hai mujh ko

walid ke intiqal par

By

wo chaalis raaton se soya na tha
wo khwabon ko unton pe lade hue
raat ke regzaron mein chalta raha
chandni ki chitaon mein jalta raha
mez par
kanch ke ek pyale mein rakkhe hue
dant hanste rahe
kali ainak ke shishon ke pichhe se phir
motiye ki kali sar uthane lagi
aankh mein tirgi muskurane lagi
ruh ka hath
chhalni hua sui ki nok se
khwahishon ke diye
jism mein bujh gae
sabz pani ki sayyal parchhaiyan
lamha lamha band mein utarne lagin
ghar ki chhat mein jade
das sitaron ke sayon tale
aks dhundla gae
aks murjha gae