koi hasrat bhi nahin koi tamanna bhi nahin

By

koi hasrat bhi nahin koi tamanna bhi nahin
dil wo aansu jo kisi aankh se chhalka bhi nahin
ruth kar baith gai himmat-e-dushwar-pasand
rah mein ab koi jalta hua sahra bhi nahin
aage kuchh log hamein dekh ke hans dete the
ab ye aalam hai koi dekhne wala bhi nahin
dard wo aag ki bujhti nahin jalti bhi nahin
yaad wo zakhm ki bharta nahin rista bhi nahin
baadban khol ke baithe hain safinon wale
par utarne ke liye halka sa jhonka bhi nahin

zindagi

By

na main mara hun
na tum mari ho
mile the jab pahli bar
kitne kiye the wade
khai kitni thi hum ne qasmen
nahin jiyenge
jo mil na pae
magar na zehnon mein thin hamare
wo murda rasmen
jo zinda rakhti hain qaid kar ke
riwayaton ke andhe pathrile mahbason mein

waqt ki baat

By

waqt hairan nigahon se mujhe dekhta hai
dekh kar haal ko shayad use mazi ka khayal aata hai
waqt jab bhi kisi zartab o hasin mazi ke gahnae hue
haal se do-chaar hua kanp utha
us ko malum nahin hai mazi
kis tarah haal ke sanche mein bigad jata hai
tu magar jaanti hai
talkhi-e-zist damakte hue shadab o jawan chehron ko
kaise afsurda-o-pazhmurda bana deti hai
kisi tarah sham-e-khizan subh-e-bahaaran bikhar jati hai
tu mujhe dekh kar hairan na ho
main wahi hun tu jise hasil-e-ummid kaha karti thi
main wahi hun tu jise pahle-pahal dekh ke chaunk utthi thi
aur ab dekh ke ye haal mere mazi ka hairan hai tu
dekh hairan na ho
waqt hairani pe majbur hai malum nahin hai is ko
mazi kyun haal ke sanche mein bigad jata hai
aur tu waqt nahin

sargoshi

By

har ek sans mein sargoshiyan hain nauhon ki
kisi bhi lab pe koi jaan-faza tarana nahin
simat simat gai angdaiyon ki pahnai
hikayat-e-gham-e-dauran koi fasana nahin
jo zulm hum pe hua hai ab us ka zikr hi kya
yahan pe hum hi sitam-khurda-e-zamana nahin
shikast-e-saz-e-mohabbat se sozish-e-gham se
har ek aariz-e-gulgun se shabnam-aluda
maal-e-ahd-e-wafa hai firaq-e-dida-o-dil
naqib-e-daur-e-guzishta hai daur-e-maujuda

sarab

By

main jahan tha
wahan tirgi thi khamoshi thi afsurdagi thi
mere kan naghmon se mahrum the
siskiyan mere honton ki miras thin
meri aankhen kisi sail-e-pur-nur ki muntazir thin
meri zindagi rakh ka dher thi
main yahan aa gaya
is tarah khuld mein
us musalsal aziyyat se kahish se bachne ki khatir
ki jis se faqat ek main hi nahin
mere jaise kai aur bhi jaan-ba-lab the
tera khuld mere liye
mere jaise kai dusron ke liye
raushni naghmagi sarkhushi ki alamat tha ye!
main jahan hun
wahan tirgi hai khamoshi hai afsurdagi hai
mere kan naghmon se mahrum hain
siskiyan mere kanon ki miras hain
meri aankhen kisi sail-e-pur-nur ki muntazir hain
meri zindagi rakh ka dher hai!