tesha-ba-kaf ko aaina-gar kah diya gaya

By

tesha-ba-kaf ko aaina-gar kah diya gaya
jo aib tha use bhi hunar kah diya gaya
saya hai pyar ka na mohabbat ki dhup hai
diwar ke hisar ko ghar kah diya gaya
in ke har ek goshe mein sadiyan muqim hain
tuti imaraton ko khandar kah diya gaya
khuddari-e-ana hai na pindar-e-zist hai
shanon ke sare bojh ko sar kah diya gaya
aangan mein har makan ke andheron ka raj hai
mahlon ki raushni ko sahar kah diya gaya
kuchh khauf-e-jaan hai aur na kuchh fikr-e-hijr-e-yar
khush-gamiyon ko ranj-e-safar kah diya gaya
hairat darogh maslahat-amez par ho kya
be-barg jhadiyon ko shajar kah diya gaya
dekha kahan hai aag ke dariyaon ka safar
jugnu ude to raqs-e-sharar kah diya gaya
kuchh ehtiram-o-husn-e-aqidat ke josh mein
har naqsh aab-e-naqsh-e-hajar kah diya gaya
khul jaega bharam teri mizan-e-adl ka
do ek harf-e-jurm agar kah diya gaya
na-ashna-e-naqsh-e-kaf-e-pa-e-am hai
wo rasta bhi rahguzar kah diya gaya
yun khush hain jaise waqiatan ho gae khuda
majburiyon ke zer-e-asar kah diya gaya
'anjum' yahan tak aane mein kya kya guzar gai
mohr-e-sar-e-mizha bhi guhar kah diya gaya

raqs-e-junun ki garmi-e-tasir dekhna

By

raqs-e-junun ki garmi-e-tasir dekhna
khulta hai kaise halqa-e-zanjir dekhna
ghis ghis ke pattharon ko banaya hai aaina
dekhen wo khwab hum ko hai tabir dekhna
harbe sab un ke un ko hi lauta diye gae
hairat se ban gae hain wo taswir dekhna
likh di zaban-e-zakhm mein rudad-e-zindagi
jismon pe us ki shokhi-e-tahrir dekhna
ab to wajud-e-maqtal-o-zindan pe aa bani
ab bediyan na tauq na zanjir dekhna
dekhe hain baithe baithe muqaddar ke tum ne khel
uth kar zara karishma-e-tadbir dekhna
qasr-e-hayat-e-nau ki hai barud par bina
'anjum' ye paedari-e-tamir dekhna

isne dekha hai sar-e-bazm sitamgar ki tarah

By

is ne dekha hai sar-e-bazm sitamgar ki tarah
phul phenka bhi meri samt to patthar ki tarah
us ke lab ko mere lab rah gae chhute chhute
main bhi nakaam chala aaya sikandar ki tarah
rang suraj ka sar-e-sham hua jata hai zard
us ka bhi ghar na ho viran mere ghar ki tarah
dard us ahd ki miras hai darna kaisa
dard ko odh liya karte hain chadar ki tarah
log har lamha badalte hain nazariye apne
zehn-e-insan bhi tawaif ke hai bistar ki tarah
ab ki yurish mein kahin gir hi na jae ye fasil
shor rahta hai mere dil mein samundar ki tarah
kaisa is ahd mein paiman-e-wafa log ab to
dost har sal badalte hain calender ki tarah
lafz aate hi mere lab pe laraz jate hain
haal-e-dil sunte hain ab wo kisi afsar ki tarah
wahi pabandi-e-auqat wahi mamulat
zindagi ghar mein basar hoti hai daftar ki tarah
ho gaya khak-nashin par ye jhukae na jhuka
kisi sar mein bhi na sauda ho mere sar ki tarah
'anjum' is ahd mein tute hue dil ke rishte
jodne par bhi hain udhde hue collar ki tarah

KHud-kushi ka alamiya

By

motor ke pahiye bijli ke khambe pe chand chhinte kuchh
chikni sadak pe dur tak ek surkh si lakir
footpath pe kuchh ja-ba-ja dhabbe siyah o surkh
nali ke gadle pani ke sine pe chand dagh
baundary-wall par bhi kuchh spot khurdure
chehron pe rahgiron ke na-khush-gawar naqsh
mahaul mein ek lamha ko be-nam sa tanaw
aankhen meri ubal padin hairan rah gaya
goya ki aaj tak ka kiya raegan gaya
dariya agar nahin to rawan ju-e-khun sahi