sawan

By

koyal ki surili tanon par tham tham ke papiha gata hai
hal ho ke hawa ki lahron mein sawan ka mahina aata hai
thandi purwa kala baadal barsa to barasta jata hai
bundon ki musalsal choton se patta patta tharraata hai
aise mein koi yaad aata hai aise mein koi yaad aata hai
ghanghor ghata bijli pani dil sine mein lahraata hai
sahra mein hawa bal khati hai baadal ko saba sankati hai
pani se zamin narmati hai sabzon se faza lahraati hai
rim-jhim rim-jhim tham tham tham tham bundon ki sada jab aati hai
har bund se dil ke taron par ek chot si padti jati hai
aise mein koi yaad aata hai aise mein koi yaad aata hai
ghanghor ghata bijli pani dil sine mein lahraata hai
badli ke dinon mai-khwanon mein sahba ki rawani kya kahna
raaton ki sharab-o-shahid se palkon ki girani kya kahna
har waqt suhana kya kahna har raat suhani kya kahna
barsat ke bhige lamhon mein shadab jawani kya kahna
aise mein koi yaad aata hai aise mein koi yaad aata hai
ghanghor ghata bijli pani dil sine mein lahraata hai
rangin gulshan rangi sahra rangi duniya rangi baaten
nache khelen dauden bhagen raaton jagen nindon maten
kya qahr hai zalim barsaten kya qahr hai zalim barsaten
bhigi duniya bhigi sansen bhige arman bhigi raaten
aise mein koi yaad aata hai aise mein koi yaad aata hai
ghanghor ghata bijli pani dil sine mein lahraata hai
sawan jo chadha phir baghon aur jhulon ki baaten hoti hain
gulshan ki rangin sairon mein kuchh rangin dhaten hoti hain
jab ahd-e-jawani ki thandi thandi barsaten hoti hain
matwali umren hoti hain matwali raaten hoti hain
aise mein koi yaad aata hai aise mein koi yaad aata hai
ghanghor ghata bijli pani dil sine mein lahraata hai

nadaron ki id

By

zardar namazi id ke din kapdon mein chamakte jate hain
nadar musalman masjid mein jate bhi hui sharmate hain
malbus pareshan dil ghamgin iflas ke nashtar khate hain
masjid ke farishte insan ko insan se kamtar pate hain
quran se dhuan sa uthta hai iman ka sar jhuk jata hai
tasbih se uthte hain shoale sajdon ko pasina aata hai
wo wasta jis ko faqon roze roze be-bechaara kya rakkhe
din dekh chuka shab dekh chuka qismat ka sahaara kya rakhe
khali hon lahu se jis ki ragen wo dil ka sharara kya rakkhe
iman ki lazzat din ka bharam iflas ka mara kya rakkhe
tarik dikhai deti hai duniya ye mah-o-khurshid use
rozi ka sahaara ho jis din wo rose hai roz-e-id use
ek madar-e-muflis id ke din bachchon ko liye bahlati hai
sar un ka kabhi sahlati hai narmi se kabhi samjhati hai
qismat pe kabhi jhunjhlati hai jine se kabhi tang aati hai
zardar padosan khush ho kar sab dekhti hai aur khati hai
paise ka pujari duniyan mein sach puchho to insan ho na saka
daulat kabhi iman la na saki sarmaya musalman ho na saka
nau-khez dulhan aur id ka din kapdon se numayan bad-hali
kumhlae hue se ghunche-tar murjhai hui si hariyali
sukha hua chehra ghurbat se utri hui honton ki lali
mayus nazar tuta hua dil aur hath bhi paise se khali
shauhar ki nazar hasrat se bhari uthti hai to khud jhuk jati hai
ehsas-e-mohabbat ki duniyan us manzar se tharraati hai
khun chus raha hai paudon ka ek phul jo khandan hota hai
pamal bana kar sabzon ko ek sarw kharama hota hai
charbi mil kar insanon ki ek chehra darakhshan hota hai
ye id ke jalwe bante hain jab khun-e-ghariban hota hai
muflis ki jawani id ke din jab subh se aahen bharti hai
duniya ye amiron ki duniya tab id ki khushiyan karti hai

mahatma-gandhi

By

shab-e-asia ke andhere mein sar-e-rah jis ki thi raushni
wo gauhar kisi ne chhupa liya wo diya kisi ne bujha diya
jo shahid-e-zauq-e-hayat ho use kyun kaho ki wo mar gaya
use yun hi rahne do hashr tak ye janaza kis ne utha diya
teri zindagi bhi charagh thi teri garm-e-gham bhi charagh hai
kabhi ye charagh jala diya kabhi wo charagh jala diya
jise zist se koi pyar tha use zahr se sarokar tha
wahi khak-o-khun mein pada mila jise dard-e-dil ne maza diya
jise dushmani pe ghurur tha use dosti se shikast di
jo dhadak rahe the alag alag unhen do dilon ko mila diya
jo na dagh chehra mita sake unhen todna hi tha aaina
jo khazana lut sake nahin use rahzanon ne luta diya
wo hamesha ke liye chup hue magar ek jahan ko zaban do
wo hamesha ke liye so gae magar ek jahan ko jaga diya

aansu

By

jab se ki mohabbat hui pyare hain ye aansu
jaise ki meri aankh ke tare hain ye aansu
kahte ho ki lillah ab aansu na girao
aise mein ki jine ke sahaare hain ye aansu
han han unhen daman-e-mohabbat mein jagah do
aankhen hain meri aur tumhaare hain ye aansu
har khun-e-jigar ke liye tayyar hun ab bhi
haara hun na main aur na haare hain ye aansu
simab hain jab tak ki hain ye qalb-o-jigar mein
aankhon mein jab aae to sitare hain ye aansu
bechain umangon ne na samjha hi na dekha
betab jawani ke nazare hain ye aansu
gham wo hai jo har chiz ko pighla ke baha de
pani nahin sayyal sharare hain ye aansu
masum nigahon ko nibhate hain ye aksar
poshida mohabbat ke ishaare hain ye aansu
gham-khwar hain mere liye shab-ha-e-alam mein
aakhir to gham-e-dost ke mare hain ye aansu

mere liye kya hai kuchh bhi nahin

By

ye ganw ka manzar sannata aur sham ki dhundli tariki
ek sham bahut rangin magar muflis ki nigahon mein phiki
dharti pe ye pani sone ka aakash pe nahren chandi ki
ye chand ye tare ye dariya mere liye kya hai kuchh bhi nahin
ye shahr ki chalti sadkon par har samt dukanen nurani
bijli mein bhi jalta ho jaise iflas ke patte ka pani
chizon ki girani mein shamil ghurbat ke lahu ki arzani
ye saz ye saman-e-ishrat mere liye kya hai kuchh bhi nahin
raaton ke andhere mein jagmag jagmag ye faza mai-khwanon ki
mezon pe nazare masti ke bahki hui lai diwanon ki
botal ki nawa-e-kulkul mein halki si khunuk paimanon ki
ye shisha ye saqi ye sahba mere liye kya hai kuchh bhi nahin
sadkon pe hasinon ka tanta jadu ka para chalta phirta
sadi ki lapetun se jin ki chhilke hai jawani ki sahba
masti ke qadam sambhle sambhle aanchal ka sira dhalka dhalka
ye husn-o-jawani rang-o-ada mere liye kya hai kuchh bhi nahin
aankhon pe meri ehsas hai kya sabzon pe agar hai barnai
kyun puchhne jaun kyari mein phulon ka mizaj-e-ranai
kya kaam hai mujh ko gulshan se kaliyan ho khili ya murjhai
ye phul ye shabnam sher-o-faza mere liye kya hai kuchh bhi nahin
collage ki ye tamir-e-khandan mamnun ghamon lam nahin
is mein kisi muflis ke ghar ke ghamgin pisar ka nam nahin
saman-e-tijarat hai ye bhi saman-e-mafad-e-am nahin
ye ilm ye hikmat hosh-ruba mere liye kya hai kuchh bhi nahin
be-jaan ho jab naqsh-e-hasti taswir-e-tamanna kya bole
taraj ke khuni panje mein tahzib ki mina kya bole
chilon ke najasat khane mein bechaara papiha kya bole
ye naghma ye sher-o-saz-o-nawa mere liye kya hai kuchh bhi nahin

jalwa-e-sahar

By

tamam auraq shabnamistan-e-sahar ki kirnon se jagmagae
tulua hoti hai subh jaise kali tamanna ki muskurae
kahin darakhton mein ghol chidiya ka baith kar chahchaha raha hai
kahin se toton ka jhund uttha faza-e-gulshan mein ghul machae
sadak jo aati hai chhawni se chahal-pahal us pe khub hi hai
nikal ke gunjaan bastiyon se bara-e-tafrih sab hain aae
usi pe aata hai ek motor bhi dak-khane ki dak lene
usi pe jate hain kuchh dehati ladi hui gadiyan hakae
tahalne jati hain ladkiyan kuchh hasin phulon ki kyariyon mein
nigah-jadu shabab-jadu jo aankh dale wo lut hi jae
idhar se ganga ko ja rahe hain kuchh aadmi chhagalen sambhaale
udhar se ganga se aa rahi hai kuchh aurten nur mein nahae
udhar se collage ki ek ladki bhi apne collage ko ja rahi hai
kitab dabe qadam badhae shabab thame nazar jhukae
udhar se ek naujawan lady nae khayalon ki aa rahi hai
nigah-e-raqsan shabab uryan jo is ko dekhe wo muskurae
udhar se shair 'nushur'-e-hairan bhi apni sairon mein ja raha hai
qadam takhayyul mein dagmagae nae shababon se chot khae