basti ki ye unchi haweli dard ki chadar mein lipti
jaane kis ko dekh rahi hai barson se viran padi
shayad tum ko yaad to hoga ahl-e-khirad wo daur ki jab
ahl-e-junun ki zanjiron se zindanon mein jaan padi
mazhab se khilwad kiya to us ka ye anjam hua
mandir bhi viran pada hai masjid bhi sunsan padi
kis ne kis ko qatl kiya pahchan sako to pahchano
samne ye talwar padi tirshul pada kirpan padi
jis din ek zalim ne ek mazlum ka nahaq qatl kiya
us din se is duniya mein kuchh rishton ki pahchan padi