rahengi ahl-e-iman shauharon ke sath jannat mein
kahin taqrir mein farma rahe the ek maulana

suni ye baat to be-sakhta ek dil-jali boli
inhi ke sath rahna hai to phir jannat mein kya jaana [...]

ye tarannum ye adakari ye body language
mil rahe hain ek ticket mein tin rangon ke sawad

nach kar hi pa sakega dad wo thodi bahut
jis ki bari aa gai gaek-numa sha'ir ke ba'd [...]

mera bachcha dekh raha tha ek ladki ko mud-mud ke
main ne puchha kis shai ne tum ko hairat mein dala hai

bachcha hairani se bola samajh nahin aati mujh ko
gore mukhde wali ke hathon ka rang kyon kala hai [...]

nazm jab aaghaz ki ek sha'ir-e-maruf ne
dast-basta ho ke ek khatun ne kholi zaban

ab to kuchh taza 'ata kije ki ye nazm-e-za'if
sunte sunte ho gae hain mere bachche bhi jawan [...]

upload facebook pe unhen us ne kar diya
main ne kiya comment ki pyari hain selfiyan

ek dost mujh se kahne laga kuchh to sharm kar
bakre ke sath us ne utari hain selfiyan [...]

magan rahte hain jaane aap kin kin ke khayalon mein
yahan maujud ho kar bhi kahan maujud hote hain

kisi bhi mah-jabin ko bhejta hun jab friend request
janab-e-wala pahle se wahan maujud hote hain [...]