har ek lafz mein poshida ek alao na rakh
hai dosti to takalluf ka rakh-rakhao na rakh

har ek aks rawani ki nazr hota hai
nadi se kaun ye ja kar kahe bahao na rakh

ye aur baat zamane pe aashkar na ho
meri nazar se chhupa kar tu dil ka ghao na rakh

hisar-e-zat se kat kar to ji nahin sakte
bhanwar ki zad se yun mahfuz apni naw na rakh

ye inkisar mubarak 'shamim' tujh ko magar
ab itna shakh-e-samar-dar mein jhukaw na rakh