aadat ban jati hai jab aawaragardi
rahne deti hai ghar kab aawaragardi

pahle apne shahr ke sare raste samjho
shauq se khul ke karna tab aawaragardi

kitni subhen ujlat mein mar jati hain
karte hain jab main aur shab aawaragardi

dar dar ghum raha hun main ek muddat se
khatm kisi surat ho rab aawaragardi

ek main hi hun 'yasir' jo badnam hua
waise to karte hain sab aawaragardi