aae tere qarib magar dur ho gae
hum dil ke hathon kis liye majbur ho gae

dastur kya ajib tha patthar ke shahr ka
aaine hasraton ke sabhi chur ho gae

samjhega kaun ahl-e-junun ke muamlat
ruswa hue to aur bhi mashhur ho gae

yun phal lage ki shakh-e-samar-bar jhuk gai
phulon bhare darakht bhi maghrur ho gae

chaaragaron ke pas nahin tha ilaj-e-gham
sine mein jitne zakhm the nasur ho gae

duniya ko zer karne ka fan jaante na the
jo apni khwahishat se majbur ho gae

samjhega 'raj apni tabiat ko koi kya
hanste hue hum aur bhi ranjur ho gae