aaj bhar de usi mai se mera jam ai saqi
aql jis mai ko samajhti hai haram ai saqi

tu badal de ye meri zist ke sham aur sahar
subh be-nur hai be-kaif hai sham ai saqi

main wo mai-kash nahin jo baith ke tanha pi lun
kitne mai-khwaron ka laya hun salam ai saqi

apni hi tishnagi-e-shauq bujhana to nahin
mangta hun main teri bakhshish-e-am ai saqi

nam-lewa tere baithe hain nigun jam kiye
bazm-e-mai-khana ka badla jo nizam ai saqi

tishna-kaam aur tahi-jam rahenge lekin
ghair ke hath se pina hai haram ai saqi