aaj nazar-andaz hue to baat hai kya hairani ki
aayat jaise log mile aur hum ne ru-gardani ki

kitne rup ki dhup hamare sine par lahrai thi
hum ne chadar khinch li khud par hum ne tan-asani ki

kya karte ek husn-e-yusuf aur zulekha kya bante
hum ne donon lutf uthae hum ne qissa-khwani ki

dariyaon se milte-julte log rahe hain pahlu mein
phir bhi hum ne bhar ke rakkhi apni chhagal pani ki

pahle main ne hukm diya tha bas mujh ko mahsus karo
baad mein us ko jism banaya jis ne na-farmani ki