aaj qismat ka bulandi pe sitara kar de
jis ko hum chahen usi ko tu hamara kar de

jo gawara bhi na ho us ko gawara kar de
us ka har zulm-o-sitam jaan se pyara kar de

chashm-e-rahmat se agar tu jo ishaara kar de
khak ke zarre ko pur-nur sitara kar de

muskura kar ai meri jaan tu utha le patwar
mauj-e-dariya ko mere haq mein kinara kar de

tiliyan kunj-e-qafas ki jo jala deti hain
meri aahon ko ilahi wo sharara kar de

jis ne aafaq mein mumtaz kiya tha mujh ko
mere malik wo karam mujh pe dobara kar de

zulm ki basti ko 'shatir' jo baha le jae
apni hasti ko wo tufan ka dhaara kar de