aakhir charagh-e-dard-e-mohabbat bujha diya
sar se kisi ki yaad ka patthar gira diya

dhunde janam janam bhi to duniya na pa sake
yun hum ne us ko apni ghazal mein chhupa diya

khushbu se us ki jism ki aangan mahak utha
kamre ko us ne apni hansi se saja diya

ye kis ke intizar mein jhapki nahin palak
ye kis ne mujh ko rah ka patthar bana diya

kya kam hai 'jafari' ki mashinon ke shor ne
logon ko apne aap se milna sikha diya