aankhon mein jo samae na manzar lapet de
ya meri fikr mein koi mahshar lapet de

un ki nigah-e-mast ka dil mein surur hai
saqi se kah do baada-o-saghar lapet de

duniya ko yun khabar to ho aalam-e-zist ki
kanton ke sath aaj gul-e-tar lapet de

hun mahw-e-khwab un ke tasawwur ki god mein
ai waqt apne dard ka bistar lapet de

hota guman hai dekh ke be-tabi-e-nazar
qatre mein jaise koi samundar lapet de

ab hum karenge quwwat-e-bazu se faisla
munsif tu apne adl ka daftar lapet de

sahra se jab palatne ka imkan hi nahin
hangam-e-rozgar mera ghar lapet de

aagah rah yun sarw-o-sanobar na ban ke ji
aisa na ho ki koi tera sar lapet de

bar-e-ilah kar de ata azm-e-haidari
ya phir samajh ke harf-e-mukarrar lapet de

sayyaad main jo haar gaya hausle ki jang
phir khud kahunga tujh se mere par lapet de