aazar-o-aziyyat hai yak-tarfa mohabbat bhi
ek turfa qayamat hai yak-tarfa mohabbat bhi

sunte the ki qissa hai afsanon ka hissa hai
jaana ki haqiqat hai yak-tarfa mohabbat bhi

khud se hi chhupate hain khud ko hi jalate hain
khud se hi raqabat hai yak-tarfa mohabbat bhi

ek shakhs se wabasta jazbaat hain saf-basta
ek tarz-e-aqidat hai yak-tarfa mohabbat bhi

main chahta hun us ko jis ke main nahin qabil
kya khubi-e-qismat hai yak-tarfa mohabbat bhi