ab ke is tarah tere shahr mein khoe jaen
log malum karen hum khade roe jaen

waraq-e-sang pe tahrir karen naqsh-e-murad
aur bahte hue dariya mein duboe jaen

suliyon ko mere ashkon se ujala jae
dagh maqtal ke mere khun se dhoe jaen

kisi unwan chalo taza karen zulm ki yaad
kyun na ab phul hi nezon mein piroe jaen

'ram' dekhe adam-abaad ke rahne wale
be-niyaz aise ki din raat hi soe jaen