ab to is bazm mein yun nesh-zani hoti hai parda-e-lutf mein khatir-shikani hoti hai dil ko de jata hai chupke se tasalli koi jab meri sham gharib-ul-watani hoti hai aadmi ke liye aasan hai aalam-shikani sakht dushwar magar khud-shikani hoti hai kis tarah kijiye ab un se taghaful ka gila lab hilate hain to khatir-shikani hoti hai samne aa ke zara hum se milao nazren kahin parde se bhi nawak-fagani hoti hai jin pe guzri hai wahi us ko samajh sakte hain dil-dahi se bhi kabhi dil-shikani hoti hai sham-e-gham aati hai ek aisi ghadi bhi 'shaariq' aap khud apne pe jab khanda-zani hoti hai