ab to khud se bhi kuchh aisa hai bashar ka rishta
jaise parwaz se tute hue par ka rishta

koi khidki bhi nahin ab to jo baqi rakhti
mere ghar se mere ham-sae ke ghar ka rishta

tum farishte hi sahi nazren na badlo yaro
kya farishton se nahin koi bashar ka rishta

mod aane do abhi samne aa jaega
kya hai aapas mein sharikan-e-safar ka rishta

tu mere chaak-gareban ko naya suraj de
jod jaun main dhundlakon se sahar ka rishta

mere hathon ki lakiren ye batati hain mujhe
pattharon hi se rahega mere sar ka rishta

sab ke chehron ki kharashen hain nazar mein 'ghausi'
aainon se hai dil-e-aina-gar ka rishta