ada-e-tul-e-sukhan kya wo ikhtiyar kare
jo arz-e-haal ba-tarz-e-nigah-e-yar kare

bahut hi talkh-nawa hun magar aziz-e-watan
main kya karun jo tera dard be-qarar kare

qadam ko faiz-e-junun se wo hausla hai nasib
jo khar-e-rah ko bhi sham-e-rahguzar kare

jagaen ham-safaron ko uthaen parcham-e-shauq
na jaane kab ho sahar kaun intizar kare

misal milti hai kitnon ki us diwane se
chaman se dur jo baitha gham-e-bahaar kare

dayar-e-jaur mein rasta hai ek yahi warna
kise pasand hai ai dil ki sair-dar kare

khuda kare gham-e-giti ka pech-o-tab ai dost
kuchh aur bhi teri zulfon ko tabdar kare

sitam ki tegh-e-qalam den use jo ai 'majruh'
ghazal ko qatl kare naghme ko shikar kare