ahl-e-khirad ko ahl-e-nazar ka pata chala
nikle to kitne shams-o-qamar ka pata chala

samjhe the hum ki sahl hai ye jada-e-hayat
aage badhe to sakht dagar ka pata chala

ab tak meri nigah mein payab thi nadi
jab dubne lage to bhanwar ka pata chala

nikle the hum to shahr tha gunjaan dur tak
laute to phir kisi ke na ghar ka pata chala

shohrat hamari phail gai hai jahan mein
muddat ke baad apne hunar ka pata chala

'firdaus' dhup dhup chala zindagi ki rah
us ko na saya-dar shajar ka pata chala