ai dil us zulf ki rakhiyo na tamanna baqi
hashr tak warna rahegi shab-e-yalda baqi

tere hangama se khush hun magar ai josh-e-junun
kuchh qayamat ke liye bhi rahe ghaugha baqi

aap ko bech chuka hun tere gham ke hathon
hai magar ishq ka tere abhi sauda baqi

gham-e-hijran mein gai jaan chalo khub hua
doston ko na rahe fikr-e-mudawa baqi

jaan sine se nikalne ko hai dil pahlu se
hai faqat us nigah-e-naz ka ima baqi

khak-e-ashiq se ugata hai mughilan ka darakht
us ki mizhgan ka hai marqad mein bhi khatka baqi