aisi jamai tu ne mere dil pe dhak bas
har-dam hai teri shab tera inhimak bas

wo aasman ka chand hai tu hai charagh-e-rah
tu dur se hi dekh use us ko tak bas

tir-o-kaman kisi ke hamein kya mitaenge
tegh-e-nazar se hote hain hum to halak bas

mil jaega qarar dil-e-be-qarar ko
mujh ko dikha de apna rukh-e-tabnak bas

hai mubtala-e-dard-o-alam meri zindagi
bin tere kat rahi hai magar thik-thak bas

kuchh is mein lutf hai na maza hai na kaif hai
qissa gharib ka hai bahut dardnak bas

khushbu nasib hoti hai us ko na gul 'qamar'
sahra-nashin ke hisse mein aati hai khak bas