aisi tadap ata ho ke duniya misal de
ek mauj-e-tah-nashin hun mujhe bhi uchhaal de

be-chehragi ki bhid mein gum hai mera wajud
main khud ko dhundhta hun mujhe khad-o-khal de

har lahza bante tutte rishte na hon jahan
pichhli rafaqaton ke wahi mah o sal de

kashkol-e-zat le ke na jaun main dar-ba-dar
hajat-rawa ho sab ka wo dast-e-sawal de

is dasht-e-pur-sarab mein bhatkun kahan kahan
zinjir-e-agahi mere pairon mein dal de

'manzur' ka ye zarf ki kuchh mangta nahin
marzi teri jo chahe use zul-jalal de