amiron ke lal-o-gohar bolte hain
gharibon ke ilm-o-hunar bolte hain

gham-e-hijr ki ek kahani tera khat
likhawat ke zer-o-zabar bolte hain

namazi bano gar mohabbat hai mujh se
hadison mein khairul-bashar bolte hain

jinhen ilm-o-fan par takabbur nahin hai
wahi aadmi mukhtasar bolte hain

azan ho rahi hai meri samt aao
masajid ke diwar-o-dar bolte hain

'sahar' narm lahje ka andaz chhodo
yahan sirf tegh-o-tabar bolte hain