apna tumhein jo kah uthe diwana-war hum
kuchh be-qarar aap the kuchh be-qarar hum

qaem hain phul khar se gulshan key raunaqen
husn-e-bahaar aap hain dard-e-bahaar hum

duniya-e-husn-o-ishq ke asrar khul gae
apne alam ke jab se hue raazdar hum

udti hai khak jaise hawaon ke sath sath
pahunche hain manzilon pe yun misl-e-ghubar hum

pur-nur jis ke nur se sham-e-alam hui
us 'raushni' ko dhundte hain be-qarar hum