apne bimar sitare ka mudawa hoti
dard ki raat agar anjuman-ara hoti

kuchh to ho jati tasalli dil-e-pazhmurda ko
ghar ki virani jo saman-e-tamasha hoti

zindagi apni is aashufta-mizaji se bani
ye na hoti to meri zat bhi sahra hoti

sari raunaq tere hone ke yaqin mein hai nihan
tu na hota to bhala kahe ko duniya hoti

hain bahut husn mein yan nadir-o-kamyab to log
koi surat nahin aisi ki jo yakta hoti

raushni ke liye phirte rahe dar dar hum log
koi dahliz to mehrab ka dhoka hoti

teri tazim se aaghaz jo karta 'rashid'
us ki duniya tere irfan ka gosha hoti