apne hone ka koi saz nahin deti hai
ab to tanhai bhi aawaz nahin deti hai

jaane ye kaun si manzil hai shanasai ki
zat-e-mutlaq koi eajaz nahin deti hai

apni uftad tabiat ka gila kya ho ki jo
khwahishon ko par-e-parwaz nahin deti hai

saat-e-khubi guzar jati hai aate jate
par ye tahrik-e-tag-o-taz nahin deti hai

jaane kyun apni ana dahr se qurbat ke liye
koi parwana-e-aghaz nahin deti hai

raat mere liye ginti hai 'taraaz' apne nujum
mere hone ka magar raaz nahin deti hai