apni kaifiyyaten har aan badalti hui sham
munjamid hoti hui aur pighalti hui sham

dagmagati hui har-gam sambhalti hui sham
khwab-gahon se udhar khwab mein chalti hui sham

gundh kar motiye ke haar ghani zulfon mein
aariz-o-lab pe shafaq surkhiyan malti hui sham

ek jhalak poshish-e-be-zabt se uryani ki
de gai din ke nashebon se phisalti hui sham

ek sannata rag-o-pai mein sada gunjta hai
bujh gai jaise lahu mein koi jalti hui sham

waqt baptisma kare aab-e-sitara se use
dast-e-duniya ki daraazi se nikalti hui sham